హెచ్ఎస్బీసీ సర్వేలో వెల్లడి
చెన్నై: ఇటీవలి ప్రపంచ ఆర్థిక సంక్షోభం అనంతరం వ్యాపార వేత్తల్లో వాణిజ్య విశ్వాస సూచీలో భారత్ రెండో స్థానం సంపాదించింది. 134 పాయింట్లతో యునైటెడ్ అరబ్ ఎమిరేట్స్ ఒకటో స్థానంలోనూ, 133 పాయింట్లతో భారత్ రెండో స్థానంలోనూ నిలిచాయని హాంకాంగ్ షాంఘై బ్యాంకింగ్ కార్పొరేషన్ (హెచ్ఎస్బీసీ) నిర్వహించిన ఒక సర్వేలో తేలింది. హెచ్ఎస్బీసీ ఇండియా ట్రేడ్ అండ్ సప్లయ్ చైన్ అధిపతి భృగురాజ్ సింగ్ ఇక్కడ విలేకరులకు ఈ సంగతి తెలిపారు. వియత్నాం 132 పాయింట్లు, బ్రెజిల్ 129 పాయింట్లు సాధించి వరుసగా 3,4 ర్యాంకులు పొందాయి. 95 పాయింట్లతో ఉన్న ఫ్రాన్స్కు సూచీలో 17వ ర్యాంకు లభించింది. 17వ ర్యాంకు ఆఖరి ర్యాంకు కావటం విశేషం. సర్వేలో తేలిన మరో ముఖ్యాంశం ఏమిటంటే.. ఆర్థిక సంక్షోభం తరువాత ఆసియా పసిఫిక్ ప్రాంతం, లాటిన్ అమెరికా, కెనడా, యూరప్ సహా కొన్ని దేశాల మార్కెట్లు ఇదివరకటి కన్నా సానుకూలంగా మారాయి. ప్రపంచ వ్యాప్తంగా చిన్న, మధ్యతరహా ఎగుమతిదారులు మొత్తం 5,120 మంది అభిప్రాయాలను సర్వే కోసం సేకరించారు. రానున్న ఆరు నెలలకు వారి అంచనాలను తెలపాలని కోరారు. అభివృద్ధి చెందిన దేశాల మార్కెట్లకు 106 పాయింట్లు దక్కితే, ఎదుగుతున్న దేశాల మార్కెట్లు 122 పాయింట్లతో సూచీలో అగ్రగాములుగా నిలిచాయి. భారత ఎగుమతిదారుల్లో విశ్వాసం స్థాయి మెరుగ్గా ఉందని భృగురాజ్ సింగ్ చెప్పారు. గత సంవత్సరం ద్వితీయార్థంలో వ్యాపార విశ్వాసం 117 పాయింట్ల వద్ద ఉండగా అది తాజాగా 133కు చేరుకొంది. రానున్న ఆరు మాసాల్లో బ్యాంకుల నుంచి ఆర్థిక సహాయం పెరగవచ్చని 60 శాతం భారతీయ ఎగుమతిదారులు అంచనా వేస్తున్నారు. 