రాజధానిలో నేటి నుంచి
గంధకం లేని పెట్రోల్‌, డీజిల్‌ అమ్మకం
స్వల్పంగా పెరగనున్న ధర
మరో 12 పెద్దనగరాల్లో కూడా
యూరో-4 ప్రమాణాల మేరకే
జిల్లాల్లో యూరో-3 ఇంధనం?
హైదరాబాద్‌ - న్యూస్‌టుడే
హైదరాబాద్‌ సహా దేశంలోని 13 పెద్దనగరాల్లో బుధవారం అర్ధరాత్రి నుంచి పెట్రోల్‌, డీజిల్‌ ధరలు స్వల్పంగా పెరగనున్నాయి. పెట్రోల్‌కు యాభై పైసలు, డీజిల్‌కు 26 పైసలు పెరుగుతాయి. స్థానిక పన్నులు అదనం. ఏప్రిల్‌ ఒకటి నుంచి 13 మహా నగరాల్లో బీఎస్‌(భారత్‌ స్టేజ్‌)-4 ప్రమాణాల మేరకు శుద్ధిచేసిన పెట్రోల్‌, డీజిల్‌ను మాత్రమే విక్రయించాలని కేంద్ర ప్రభుత్వం ఆదేశించడంతో ఆ మేరకు ధరలు పెరుగుతున్నాయి. అల్ట్రా లోసల్ఫర్‌ పెట్రోల్‌ (యూఎస్‌ఎల్‌పీ), అల్ట్రా లోసల్ఫర్‌ డీజిల్‌(యూ ఎస్‌ఎల్‌డీ)గా పిలిచే ఈ ఇంధనాలను 2006 నుంచే యూరప్‌, అమెరికా దేశాల్లో తప్పనిసరి చేశారు. ప్రస్తుతం మహా నగరాల్లో బీఎస్‌-3 ప్రమాణాల పెట్రోల్‌, డీజిల్‌ విక్రయిస్తున్నారు. బీఎస్‌-4కు మారడం వల్ల వాహనాల నుంచి వెలువడే గంధకపు కాలుష్యం 85 శాతం తగ్గిపోతుంది. ప్రస్తుతం డీజిల్‌ ఇంధనంలో గంధకపు కాలుష్యం 550-350 పీపీఎం(పార్ట్స్‌పర్‌ మిలియన్‌) ఉండగా, యూఎస్‌ఎల్‌డీ వాడకం తర్వాత 50 పీపీఎంకు తగ్గనుంది. పెట్రోల్‌ ఇంధనంలో గంధకపు కాలుష్యం 150 పీపీఎం ఉంది. యూఎస్‌ఎల్‌పీ వాడకం తర్వాత అది కూడా 50 పీపీఎంకు తగ్గనుంది. వీటిని దాదాపుగా గంధకం లేని పెట్రోల్‌, డీజిల్‌ అని చెప్పుకోవచ్చు. కార్బన్‌ మోనాక్సైడ్‌ (సీఓ), నైట్రోజన్‌ ఆక్సైడ్స్‌ (ఎన్‌ఓఎక్స్‌), వోలటైల్‌ ఆర్గానిక్‌ కాంపౌండ్స్‌ ఉద్గారాలు కూడా తగ్గుతాయి. ఆమ్ల వర్షాలను నివారించవచ్చు. ఇంధనం మూడు శాతం వరకు ఆదా అవుతుంది.
బీఎస్‌-4 పాటించే నగరాలు: ఢిల్లీ, ముంబయి, కోల్‌కతా, చెన్నై, హైదరాబాద్‌, బెంగుళూరు, లక్నో, కాన్పూర్‌, ఆగ్రా, సూరత్‌, అహ్మదాబాద్‌, పుణె, షోలాపూర్‌
* పాత కార్లలో బీఎస్‌-4 ఇంధనం వాడితే కాలుష్య తీవ్రత పెద్దగా తగ్గదు. ఇంజిన్‌కు ప్రమాదమేమీ ఉండదు. 2000 సంవత్సరం ముందు మోడల్‌ వాహనాల్లో గంధకం లేని డీజిల్‌ బీఎస్‌-4 వాడితే లూబ్రికేషన్‌ సమస్యలు వస్తాయని ఇంటర్నెట్లో కథనాలు ఉన్నాయి. వాటిని ధ్రువీకరించాల్సి ఉంది.
 కార్ల ఇంధన సామర్థ్యం పెంచేందుకు ఆధునిక ఇంజిన్ల నిర్మాణంలో అల్యూమినియం వాడకాన్ని పెంచారు. ఫిల్టర్లు చేర్చారు. ఇతర మార్పులు చేశారు. అవే బీఎస్‌-4 ప్రమాణాల వాహనాలు. వాటికి తగ్గట్లు ఇంధనం, ఇంజినాయిల్‌లో కూడా మార్పులు చేస్తున్నారు. అవే బీఎస్‌-4 ప్రమాణాల ఇంధనాలు. ఇంధనం పొదుపు, పర్యావరణ పరిరక్షణ దృష్ట్యా ఈ మార్పులు వినియోగదారుడికే లాభం. - వల్లూరుపల్లి వరుణ్‌దేవ్‌, డైరెక్టర్‌, వరుణ్‌ మోటార్స్‌ |
| నియంత్రణ అక్టోబర్‌ 1కి వాయిదా |
